Dum la vizito al Baduy Luar (la “Ekstera” Baduy) estas reguloj kiujn ĉiu vizitanto devas sekvi por respekti la vilaĝon kaj por la komforto kaj sekureco de vilaĝanoj kaj de vizitantoj. Se vi kredas, ke vi povas sekvi tiujn regulojn, ni invitas vin aliĝi! (Mendilo baldaŭ aperos.)
Pli sube vi vidos la kompletan liston de servoj, kiuj estas kaj ne estas inkluzivitaj en la ekskursa kotizo. Poste ni ankaŭ aldonos ĉi tie detalan horaron de la vizito.
Povas aliĝi maksimume 20 personoj.
Reguloj de vizito al Baduy Luar
Ĉi-sube estas resumo de la ŝlosilaj reguloj.
Kion fari:
- Alveni ĝustatempe. Por respekti la tempon de aliaj ekskursantoj, venu strikte ĝustatempe al la rendevuejo.
- Peti permeson. Je alveno, petu permeson de la vilaĝestro aŭ loka gvidanto por eniri la Baduy-areon.
- Kunporti esencajn materialojn. Vi rajtas kunporti manĝaĵojn, necesaĵojn, poŝlampon, kaj kontantan monon.
- Foti kaj filmi: Fotado kaj filmado estas permesataj en Baduy Luar.
- Tranokti. Por la maksimuma sperto, estas rekomendinde tranokti almenaŭ unu nokton kun la lokanoj. Vi povas resti pli ol unu nokton, sed estas konsilinde translokiĝi inter vilaĝetoj ĉiun nokton.
- Surmeti piedvestaĵojn. Vi rajtas surmeti piedvestaĵojn en Baduy Luar.
Kion NE fari:
- Kunporti malpermesatajn objektojn. Ne kunportu cigaredojn, alkoholaĵojn, drogojn, radiojn, kasedojn, laŭtparolilojn, sapon, ŝampuon, aŭ dentopaston.
- Forĵeti rubaĵojn en hazardaj lokoj aŭ malrespekti la medion. Ne forĵetu ekster rubujoj, tranĉu aŭ forprenu plantojn, aŭ eniru protektatajn arbarojn.
- Uzi malrespektan lingvaĵon. Evitu sakradon aŭ insultadon dum parolado kun aliaj homoj.
- Eniri en Baduy Dalam. Eksterlandanoj estas strikte malpermesataj al Baduy Dalam (la “Interna” Dalam, kiu ne estos parto de ĉi tiu ekskurso).
Aldonaj reguloj por konsideri:
- Teknologio. Dum oni permesas la uzadon de moderna teknologio en Baduy Luar, estas ĝenerale bona praktiko limigi ĝian uzadon, kiel signo de respekto al ilia tradicia vivstilo.
- Vestado. Vestiĝu modeste kaj respekteme.
- Interagoj. Estu respektema dum interagoj kun Baduy-popolanoj.
Atentu: Aliĝante al ĉi tiu ekskurso vi konsentas sekvi la ĉi-suprajn regulojn. Ankaŭ okazos programero dum IJK por orientiĝi pri Baduy Luar kaj la ekskursa plano.
Servoj inkluzivitaj kaj neinkluzivitaj
Ĉi tiu ekskurso kostas €30 por persono (p.p.). Vidu liston de servoj inkluzivitaj:
- speciala transporto de la rendevuejo (ĉe stacidomo “Rangkasbitung“),
- impostoj por eniri la Baduy-areon
- loĝado dum du tagoj kaj unu nokto;
- du manĝoj (vespermanĝo kaj matenmanĝo)
- trinkaĵoj tra la tuta restado (kafo, teo, lakto, akvo)
- honorarioj por la ŝoforo kaj la loka Baduy-gvidanto
- plantbazitaj anstataŭaĵoj al sapo kaj ŝampuo
- ceteraj servoj: suveniroj, sukurado (se necese), kaj fotoj
Kion la ekskurso NE inkluzivas:
- transporto de Ĝakarto al stacidomo Rangkasbitung (atingebla per regiona trajno, sufiĉas uzi la transportkarton aĉeteblan en Ĝakarto)
- kotizo por valizportistoj;
- trinkmono por la gvidanto(j); aŭ
- aliaj personaj elspezoj (manĝaĵoj kaj trinkaĵoj krom tiuj provizotaj).
Horaro de la ekskurso
La ekskursa grupo ekiros per trajno ekde Ĝakarto la 18-an de aŭgusto (lundon) je 07:30 matene kaj alvenos al stacidomo Rangkasbitung ĉirkaŭ 09:00 matene. La ekskurso finiĝos en Ĝakarto ĉirkaŭ 17:00 mardon la 19-an de aŭgusto.
Pliaj detaloj pri la horaro de la ekskurso baldaŭ aperos.