Venu al la malfermitaj sesioj pri la IJK 2025

Je la 31-a de januaro 2025 (vendredo) finiĝas la unua aliĝperiodo, kiu ebligas aliĝon per la plej favorprezaj kotizoj. Ĉu vi interesiĝas partopreni en la IJK? Ne maltrafu ĉi tiun ŝancon!

Ĝis nun aliĝis 69 homoj el 24 landoj, kaj vi povas aliĝi al tiu plilongiĝanta listo!

Malfermitaj informsesioj pri la IJK

Ĉu vi volas aliĝi sed volas scii pli da informo? Ni invitas vin al niaj venontaj malfermitaj informsesioj kiuj okazos la 25-an de januaro (sabato) per Zoom. Dum la informsesioj vi informiĝos pri la kotizoj, loĝebloj, alvenebloj, kaj alia esencaj detaloj pri la IJK.

Por ĉeesti, necesas antaŭregistriĝi per la ĉi-subaj ligiloj. Post via registriĝo, vi aŭtomate ricevos instrukciojn por aliri la sesion per via retadreso. Rigardu la diversajn sesiojn ĉi-sube kaj elektu tiun plej taŭgan laŭ via horzono. Ĉiu sesio daŭras unu horon. Notu ke estas malsama ligilo por ĉiu sesio.

  • Informsesio 1: La 25-a de januaro (sabato), 09:00 UTC – Registriĝi
  • Informsesio 2: La 25-a de januaro (sabato), 16:00 UTC – Registriĝi
  • Informsesio 3: La 25-a de januaro (sabato), 20:00 UTC – Registriĝi

Ĉiuj estas bonvenaj al la malfermitaj informsesioj, ĉu TEJO-membroj aŭ ne. Invitu viajn amikojn kaj samlandanojn kaj kune informiĝu pri la plej mojosa evento de la jaro!

Mi ŝatus aliĝi!

Se vi jam decidis aliĝi al la 81-a IJK, simple iru al la reta aliĝilo. Memoru remembriĝi en TEJO por 2025 por ricevi specialan rabaton de 50€. Aliĝinte, elpagu vian kotizon aŭ sendu la minimuman antaŭpagon (30€) ĝis la 31-a de januaro por profiti de la plej favorprezaj kotizoj.  

Se vi havas demandojn, vizitu nian retpaĝaron aŭ ne hezitu skribi al nia teamo per ijk2025@tejo.org.


Novaj datoj de la 81-a Internacia Junulara Kongreso (IJK) en Cisarua, Indonezio: 09-16.08.2025

TEJO anoncas, post interkonsento kun la Kongresa Komisiono (KK), ke la 81-a Internacia Junulara Kongreso (IJK) en Cisarua, Indonezio okazos en novaj datoj: de la 9-a ĝis la 16-a de aŭgusto 2025

La ŝanĝo de la datoj respondas al la lastatempe anoncita ŝovo de la 110-a Universala Kongreso (UK) en Brno, Ĉeĥio, kiu nun okazos de la 26-a de julio ĝis la 2-a de aŭgusto 2025, unu plenan semajnon post siaj originale planitaj datoj. TEJO komprenas, ke la ŝovo signifas, ke la fino de la UK koincidus kun la komenco de la IJK, kiuj originale estis planita por la 2-a ĝis la 9-a de aŭgusto 2025. Konsiderante la grandan distancon inter la du kongresoj, la koincido prezentus konkretajn defiojn al multaj aktivuloj de nia movado kiuj deziras partopreni en ambaŭ kongresoj.

TEJO kaj la KK konkludis, ke la plej taŭga ŝanĝo estas je unu plena semajno, celante kongresi specife de sabato al sabato, por ke junaj studentoj kaj laboristoj, kiuj ofte havas limigitajn feriotagojn, povu laŭeble plene partopreni en la IJK. La ŝanĝon subtenas ankaŭ la fakto, ke la kongresejo, Alfa Resort Hotel & Conference, konsentis amendi la kontrakton pri la rezervo sen aldonaj kostoj aŭ postuloj. Fine, aliĝintoj, ĝis nun sume 31, estis antaŭe avertitaj pri la eblo ŝanĝi la datojn kaj eĉ konsultitaj pri la eventualaj efikoj de tiu ŝanĝo.

La ŝanĝo ne nur ebligas pli trankvilan vojaĝadon inter kongresoj sed krome malfermas tre interesan oportunon por homoj tra la tuta mondo, kiuj ŝatus pli bone enprofundiĝi en la lokan kulturon: unu tagon post la IJK, la 17-an de aŭgusto, venos la 80-a datreveno de la sendependiĝo de Indonezio, en kiu okazos kulturaj festoj tutlande. Ĉi tiu okazo estas nemaltrafebla sperto estante en unu el la plej kulture diversaj landoj de la mondo. 

Se pro la ŝanĝo iu aliĝinto ne plu povos (plene) partopreni en la 81-a IJK, TEJO pretas repagi la kotizojn jam pagitajn. Por peti amendon aŭ nuligon de la aliĝo sufiĉas skribi al ijk2025@tejo.org.

Tuj aliĝu al la 81-a IJK por profiti de la plej malaltaj kotizoj. Se vi ankaŭ ŝatus fari la 81-an IJK pli inkluziva, konsideru donaci al la fonduso “Partoprenu IJK-n” de TEJO. 

Azien, Indonezien!

Azien, Indonezien. Aliĝu nun al la 81-a IJK en Cisarua, Indonezio!

Redakto (03/12/2024): La novaj datoj de la 81-a IJK estas de la 9-a ĝis la 16-a de aŭgusto. Plena anonco legeblas ĉi tie.

Granda anonco: Ekde nun eblas aliĝi al la 81-a Internacia Junulara Kongreso (IJK) kiu okazos de la 2-a ĝis la 9-a de aŭgusto 2025 en Cisarua (Bogor), Indonezio!

Atendas vin la 81-a IJK, la unua ekstereŭropa IJK post la kronvirusa pandemio kaj la unua en Azio post pli ol unu jardeko. Ĉi tiu kongreso okazos en Alfa Resort Hotel & Conference en la distrikto de Cisarua, ĉirkaŭ 75 kilometrojn sude de la indonezia ĉefurbo, Ĝakarto. Dum la kongreso, partoprenantoj de ĉiuj aĝoj ĝuos tutan semajnon ĉirkaŭita de montoj kaj tropikaj arbaroj kaj enprofundiĝos en la lokan kulturon. La kongreso ankaŭ proponas grandan okazon por konatiĝi, amikiĝi, kaj kunlabori kun samideanoj el diversaj partoj de Azio kaj Oceanio. 

Iru tuj al la aliĝilo de la 81-a IJK kaj estu inter la unuaj aliĝintoj kontraŭ la plej favoraj prezoj. Atentu, ke la unua aliĝperiodo daŭros ĝis la 31-a de januaro 2025. Poste, abonu nian informkanalon kaj babilu kun aliaj kongresanoj en Telegramo.

Ĉu vi ankoraŭ hezitas aliĝi rapide? Konsideru do nian tre specialan oferton por vi: se vi aliĝas kaj pagas la minimuman antaŭpagon ĝis la 15-a de decembro 2024 (dimanĉo), vi ricevos senpagan T-ĉemizon. Belega zamenhoftaga donaco, ĉu ne?